ԱՅՍՊԻՍԻՆ ԵՆ ՀԱՂԹՈՂՆԵՐԻ ԱՌԱՋԱՐԿՆԵՐԸ-1

Կա միայն Արմենիայի կնիքը

Հեռուստատեսության եւ ռադիոյի ազգային հանձնաժողովը հնարավորություն ընձեռեց ինձ ծանոթանալ հեռուստաընկերությունների մրցութային առաջարկներին: Եվ այժմ «Առավոտում» հրապարակում եմ հոդվածաշար՝ այդ առաջարկների վերաբերյալ: Նշեմ, որ առաջին իսկ մրցութային առաջարկում հայտնաբերվեցին փաստաթղթեր, որտեղ բացակայում էին կնիքները եւ անհրաժեշտ տվյալները: Բացի այդ՝ հաստատվեց այն, ինչն առանց այդ էլ կարծես պարզ էր, որ «Արմենիա» հեռուստաընկերության եւ «Արմնյուզի» մասնագիտական աշխատակազմը, մեղմ ասած, այնքան էլ չեն տարբերվում:




Եվ այսպես, թիվ 1 մրցույթի միակ մասնակիցը «Արմենիա Թի-Վի» ՓԲԸ-ն էր, որը 2010 թվականի իր մրցութային առաջարկում նշել է. «Արմենիա» հեռուստաընկերությունը գրեթե ամբողջությամբ իրականացրել է իր նախորդ մրցութային առաջարկի հիմնախնդիրները, չասելու համար, որ շատ ու շատ ոլորտներում նույնիսկ առաջ անցնելով տրված խոստումներից»: Սակայն իր նախորդ՝ 2003-ի առաջարկում «Արմենիան՚» ծրագրային քաղաքականությունը ներկայացնելիս շարադրել էր արդեն իրականացված ծրագրերը՝ ընդամենը հավելելով. ՙԱպագայում դրանք էապես փոփոխվելու են՚: Եվ ինչպես այն ժամանակ հնարավոր չէր առանձնացնել, թե ՙԱրմենիան՚ ինչ է խոստացել ու կատարել կամ չի կատարել՝ նույնն է նաեւ այժմ: Մրցութային նոր առաջարկում էլի վերաշարադրել են իրենց իրականացրած ծրագրերը: Հայրենական հաղորդումների ծավալը նշել են 92 տոկոս՝ հավելելով, թե դրան արդեն հասել են, սեփական հաղորդումների ծավալը՝ 90 տոկոս. ՙՆերկայումս գիտակրթական եւ մշակութային հաղորդումների սակավ ծավալը պայմանավորված է հեռուստադիտողների՝ նման հաղորդումների նկատմամբ քիչ պահանջով, սակայն ՙԱրմենիա՚ հեռուստաընկերությունը փորձում է հեռուստադիտողների շրջանում ավելի մեծ հետաքրքրություն առաջացնել մշակութային եւ գիտակրթական հաղորդումների նկատմամբ՚:

Եվ էլի՝ կա միայն Արմենիայի կնիքը

Ապագա ծրագրերը մանրամասնելու առումով բավական սակավախոս այս ընկերության մրցութային առաջարկում սակայն հանգամանալից շարադրված են այսօրինակ մանրամասներ. ՙՙԱրմենիա՚ հեռուստաընկերության հաշվապահությունը իրենից ներկայացնում է մի բաժին, որը գլխավորում է գլխավոր հաշվապահը՚, ՙԱրմենիա՚ հեռուստաընկերության հաշվապահության բաժինը տարիների ընթացքում բազմիցս է արժանացել գովասանքի ղեկավարության կողմից իր պարտականությունների պատշաճ եւ ժամանակին կատարման համար՚, ՙԳանձապահների բաժինը հանդիսանում է ցանկացած ընկերության օրենքով սահմանված պարտադիր օղակներից մեկը՚, ՙԱնվտանգության բաժինը իրականացնում է հեռուստաընկերության տարածքների պահպանությունը, ինչպես նաեւ ապահովում է աշխատակիցների անվտանգությունը՝ արտագնա նկարահանումների ժամանակ՚: Առավել մանրամասն՝ նաեւ գրաֆիկական պատկերներով, ներկայացված է, որ 2009 թվականին ՙԱրմենիան՚ ՙմիշտ գլխավորել է հեռուստատեսությունների վարկանիշային աղյուսակը, ինչը վկայում են GFK ընկերության վարկանիշային պաշտոնական տվյալները՚: Նաեւ, որ ՙ2010 թվականը ՙԱրմենիա՚ հեռուստաընկերությունը նույնպես դիմավորեց եւ այժմ արդեն ավարտին է հասցնում՝ պահպանելով բացարձակ առաջատար դիրքեր հեռուստատեսային շուկայում եւ որպես շուկայի ամենամեծ հեռուստադիտողների բանակն ունեցող, եւ որպես ամենավարկանիշային հեռուստատեսություն: Ինչի մասին կրկին վկայում են GFK ընկերության պաշտոնական վարկանիշային տվյալները՚:

Ռաֆիկ Հովհաննիսյանը՝ Արմենիայի փաթեթում

Սակայն ո՜չ այս ամենը, ո՜չ անգամ ծրագրերի շարադրանքը հաղթողին որոշելու համար ՙՀեռուստատեսության եւ ռադիոյի մասին՚ օրենքով սահմանված չափորոշիչներ չեն՝ ի տարբերություն մրցութային առաջարկում ամրագրված հետեւյալ խոստման. ՙԱրմենիա՚ հեռուստաընկերությունը նախատեսում է իրականացնել ներդրումային ծրագիր՝ անհրաժեշտության դեպքում հետագա տասը տարիների ընթացքում կատարելով ներդրում մինչեւ 3,7 մլրդ դրամ ընդհանուր ծավալով՚: Մանրակրկիտ ներկայացված է, թե ինչպես են բաշխվելու այդ ներդրումները: Ասենք, 2013 թվականին ՙԿսկսվեն ինտեգրման աշխատանքները միջազգային սոցիալական կայքերին, ինչպիսիք են Twitter, Facebook՚: Միջանկյալ նկատենք, որ դրանց ինտեգրվելու համար առանձնապես միջոցներ պետք չեն: Սակայն ահա մեկ այլ խոստում, որը մեր կարծիքով՝ մի առանձին վերցրած հեռուստաընկերության խնդիրը չէ. ՙ2014 թվականին, շարունակելով IT տեխնոլոգիաների ինտեգրումը, կսկսվեն աշխատանքներ միջազգային սոցիալական սայթերի հայկական տարբերակների ստեղծման նպատակով՚: Հիշենք ապագայի համար՝ ՙԱրմենիան՚ փաստորեն խոստանում է ստեղծել Twitter-ի եւ Facebook-ի հայկական տարբերակները: Իսկ 2016 թվականին ներդրումները նախատեսում են ուղղել Համահայկական լրատվական համակարգի կառուցմանը. ՙՆոր IReporter կոնցեպտի իրականացում, որի շրջանակներում մարդիկ կդառնան լրատվական մի ընդհանուր համակարգի մաս՚, ինչպես նաեւ կատարվելու են ներդրումներ ՙՀայաստան-Սփյուռք կապերի ամրապնդման նպատակներով՚:

Ռաֆիկ Հովհաննիսյանը՝ Արմնյուզի փաթեթում

Սակայն ի՞նչ միջոցներով է արվելու այս ամենը: Այս մասին մրցութային առաջարկում չկա որեւէ փաստաթուղթ: Միայն նշված է: ՙՎերոհիշյալ ներդրումները իրականացվելու են ընկերության գործունեության ընթացքում ձեւավորված միջոցներից, ինչպես նաեւ անհրաժեշտության դեպքում ընկերության բաժնետերերի կողմից հավելյալ ներդրումների միջոցով՚:

Չի սխալվում նա, ով ոչ մի փաստաթուղթ չի ներկայացնում: Քանի որ այն դեպքերում, երբ մրցութային առաջարկում ընդգրկվել են փաստաթղթեր՝ նկատելի են դարձել որոշակի թերացումներ: Ասենք, լուսանկարներում ներկայացված է ՙWARNER BROS. INTERNATIONAL TELEVISION DISTRIBUTION INC՚-ի հետ 2010 թվականի փետրվարի 26-ի համաձայնագիրը, որը ճիշտ է՝ տիտղոսաթերթի վրա է, բայց կնիք չկա, ճիշտ է՝ ստորագրություն կա եւ գրված է տնօրեն, բայց չկա անուն ազգանուն: Նույն պատկերը նաեւ ՙDigital rights group limited՚-ի հետ կնքված համաձայնագրի դեպքում է՝ էլի կնիք չկա, անուն ազգանուն չկա: Եվ ՀՌԱՀ նախագահը սրանք էլ կարող էր անվանել ՙանորոշ անձանց կողմից տրամադրված՚ կամ անգամ կեղծ փաստաթղթեր: Սակայն նշենք, որ այս համաձայնագրերը հեռարձակման լիցենզիա տրամադրելու վերաբերյալ են, եւ անմիջական նշանակություն չունեն հաղթողին որոշելու համար:

Օրենքով հաղթողին որոշելու չափանիշներից մեկը աշխատակազմի մասնագիտական պատրաստվածությունն է, մինչդեռ ՙԱրմենիայի՚ եւ ՙԱրմնյուզի՚ մրցութային առաջարկներից մյուս լուսանկարներն ապացուցում են այն, ինչ առանց այդ էլ հանրահայտ էր, որ այդ հեռուստաընկերությունների ռեսուրսները նույնն են: ՙԱրմենիա՚ հեռուստաընկերության մրցութային առաջարկում նշված է ՀՀ վաստակավոր լրագրող Ռաֆիկ Հովհաննիսյանը որպես ՙ2000-ից մինչեւ հիմա՝ ՙԱրմենիա՚ հեռուստաընկերության քաղաքական մեկնաբան՚: Ռաֆիկ Հովհաննիսյանը նշված է նաեւ ՙԱրմնյուզ՚ ընկերության մրցութային առաջարկում, ինչպես նաեւ լրագրողներ Արկադի Գրիգորյանը, Արմինե Ամիրյանը, որոնք հայտնի են որպես ՙԱրմենիա՚ հեռուստաընկերության աշխատակիցներ: Մինչդեռ ՙԱրմենիայի՚ մրցութային առաջարկում նշված աշխատակազմի մեծամասնությունը նրանց սերիալում նկարահանվող դերասաններն են՝ Արմեն Մարությանը, Արտաշես Ալեքսանյանը, Լուիզա Ղամբարյանը, Ռուդոլֆ Ղեւոնդյանը եւ այլք:

Առաջ անցնելով նշենք, որ մեր ձեռքի տակ կա նաեւ մեկ այլ հեռուստաընկերության մրցութային առաջարկ, որի հենց ֆինանսական առումով վճռորոշ փաստաթղթերից մեկը չի պարունակում անհրաժեշտ տվյալները: Այս մասին՝ հաջորդիվ:
ԱՆՆԱ ԻՍՐԱՅԵԼՅԱՆ